我要買雨褸

小朋友到了某個階段，見到其他人有甚麼，總想自己都能夠擁有。最近，無論去超級市場或商場，飛飛總會運用這一招："媽媽，我有啲嘢比你睇，你跟我過嚟。"其實，她想告訴飛媽：我好想要，你買比我就好喇!

或者不單小朋友，連大人都會如此，因為我們慣性地不滿足和有比較!

前陣子常下雨，飛飛提出要求，想要一件新雨衣，因為她見到同學仔的雨衣是斗蓬型連書包也可遮蔽，而她的那件卻不能。

媽：仲可以用喎!唔好見到人哋有乜，就要買乜啦!

飛：遮唔到書包呀!仲好緊添，連條繩都爛埋!(但仍然很新淨)

媽：真係？(其實亞媽個心好軟，但又不想那麼容易滿足她的慾望)等我考慮下.......

過了幾天，滂沱大雨，飛飛又再次提出要求。在再三 "懇求" 下，唯有答應她。因為事實上舊的那件不合用。

在答應她後，她就不停地叮囑........

飛：今日你放工記住買啦!

媽：我放工已經好夜，同埋太和無得買....

飛：(即時提出意見)你可以到一田買吖! (吓! 你點知一田有得買？)

甚至電話留言提醒飛媽.......

飛：我係陳羚飛，我想同我媽媽講，睇下佢買到雨褸未，我要Thomas個款喎!唔該!

............幾經轉折終於在某文具店看到她想要的，然後致電給她確認.....

媽：嗱!呢度無Thomas，得Mickey Mouse同公主，你要邊件？

飛：公主!你係唔係而家買呀？

媽：係呀!

飛：Yahoo!! (非常超興奮的反應----我終於明白這個字是甚麼意思!)

.........當她試上身.....

飛：(投訴)我要嘅係前面遮晒塊面嗰款.....唔係咁....

媽：(xO # @**----有點火，但又不能發)嗰到無你想要嘅款，呢件都遮到， 唔可以左要求右要求，買咗就算.....(她沉默了一會，飛媽還以為她會反駁)

飛：(誠心地)媽媽，多謝你! (幸好，她最終明白。但飛媽認為有必要讓飛飛明白為什麼飛媽會答應她買，於是在晚飯時拿出來跟她說....

媽：飛飛，你知唔知媽媽點解會答應你買雨褸？

飛：(搖搖頭)

媽：因為我覺得你真係有咁嘅需要，即係新嘅雨褸可以幫你遮雨遮得更好，唔係因為我哋有冇錢嘅問題，亦都唔係因為人哋有而自己一定要有。所以，當你下次想要買嘢時，你可以問下自己兩個問題，一，有冇需要；二，唔係即刻要買，可以睇下係唔係太貴，唔值得要。明唔明？

飛：（似懂非懂）哦！

心裡仍默默向天父祈禱：教養真不容易呀!求賜我們智慧。這一代不同我們那一代，實在物欲過盛，有太多吸引。看到甚麼，要甚麼。大人小朋友也一樣，人有i.Phone，我也要有一部。當錢過份輕而易舉地滿足一個小朋友的需要時，我們更加要看重正確價值觀的灌輸。

老實，我也在把關上做得不好，仍需多多努力和反省。